غزني پوهنتون کې استادانو او کارکوونکو ته په جماعت سره د لمانځه ادأکولو د فضیلت او اُخروي ګټو اړوند دیني سمینار ترسره شو.
قمري نېټه: محرم الحرام ۲۶، ۱۴۴۷ هـ.ق
لمريز نېټه: سرطان ۳۱، ۱۴۰۴ هـ.ش
مېلادي نېټه: جولای ۲۲، ۲۰۲۵م
غزني پوهنتون کې د دعوت او ارشاد آمریت له لوري په جماعت سره د لمانځه ادأکولو فضیلت او اخروي ګټو بیانولو په موخه دیني سمینار وړاندې شو. په سمینار کې د پوهنتون ټولو استادانو، او کارکوونکو ګډون کړی وو.
دغه سمینار د یاد آمریت آمر مولوي نقیب احمد منذر له لوري وړاندې شو چې پکې د جماعت لمانځه پر روحاني ارزښت، ټولنیز تأثیر او د اخیرت له پاره یې پر ثوابونو روښانه رڼا واچول شوه. او دارنګه د جماعت لمانځه په اړه د قرآن کریم آیاتونه، د رسول الله ﷺ احادیث او د اسلامي فقهې اصول بیان شول. د سمینار پر مهال ښاغلي منذر وویل چې د جماعت لمونځ نه یوازې د الله تعالی د رضا لامل کېږي، بلکې د مسلمانانو ترمنځ د ورورولۍ، یووالي او نظم ښکاره نښه هم ده. رسول الله ﷺ دا لمونځ تر انفرادي لمانځه ۲۷ چنده غوره ګڼلی دی هغه زیاته کړه چې د جماعت لمونځ د اسلامي ټولنې د رغونې بنسټ دی. او لمونځ یوازې یو انفرادي عبادت نه دی، بلکې د ټولنیزې همغږۍ، روحانیت او انضباط ښکارندوی هم دی.
د نشراتو او عامه اړیکو عمومي مدیریت
