د غزني پوهنتون د چاپېریال پاکوالي په موخه عمومي اشر(حشر) ترسره شو.
قمري نېټه: شوال ١٢، ۱۴۴۶ هـ.ق
لمريز نېټه: وري ٢١، ۱۴۰۴ هـ.ش
مېلادي نېټه: اپرېل ١٠، ۲۰۲۵م
د غزني پوهنتون د مالي او اداري چارو معاونیت له لوري، د دغه ولایت د ښاروالي په ګډه همکارۍ، د پوهنتون د چاپېریال د پاکوالي په موخه عمومي حشر ترسره شو.
یاد حشر د مالي او اداري چارو معاونیت په مستقیمه لارښوونه او نظارت ترسره شو. د دې فعالیت په ترڅ کې د پوهنتون ټولو خدماتي کارکوونکو او د ښاروالي کارکوونکو ګډون کړی وو.
د پاکوالي په دغه پراخ حشر کې، د پوهنتون ټولې ساحې، سړکونه، شنه ساحې، انګړونه او نور عام ځایونه له کثافاتو، خځلو او نورو ناوړه موادو څخه پاک کړل شول. دغه راز د چاپېریال د سمون او ښې ښکلا لپاره د بوټو اصلاح، او ځینو نورو تنظیفي اقداماتو ته هم پاملرنه وشوه.
د دې حشر اساسي موخه د پوهنتون د چاپېریال پاکوالی، د صحي فضا رامنځته کول، د عامه ذهنیت بیدارول، او د ټولنیز مسؤلیت احساس لوړول و.
د یاد پوهنتون مالي او اداري مرستیال دا ډول کړني د چاپېریال د سمون، ښکلا او د زده کړې لپاره د سالمي فضأ د برابرولو په برخه کې مهم او ارزښتناک بولي.
ښاغلي معاون د ښاروالي محترمو مسؤلینو، خدماتي کارکوونکو، او ټولو ګډونوالو له نه ستړې کېدونکو هڅو څخه مننه کوي، او زیاته یې کړه چې دا ډول ګټور ټولنیز فعالیتونه دوام ومومي.
د نشراتو او عامه اړیکو عمومي مدیریت
