غزني پوهنتون کې شرعیاتو پوهنځي ته د نویو بریالیو محصلینو د ښه راغلاست او د پوهنتون له علمي او تحصیلي چاپیریال سره د هغوی د بلدتیا په موخه معلوماتي سمینار ترسره شو.
غزني پوهنتون کې د شرعیاتو پوهنځي نویو بریالیو محصلینو ته د ښه راغلاست، د پوهنتون له علمي او تحصیلي چاپېریال سره د هغوی د بلدتیا او د پوهنتون د تحصیلي چارو، اصولو او مقرراتو په اړه د معلوماتو ورکولو په موخه معلوماتي سمینار ترسره شو.
د سمینار د پیل پرمهال د محصلانو مرستیال مفتي عزت الله نوري نوو جذب شوو محصلینو ته د ښه راغلاست او مبارکۍ ترڅنګ؛ د دیني او عصري علومو په اړه هر اړخیز معلومات وړاندې کړل او زیاته یې کړه چې د دینې علومو زده کړه فرض عین او هر مسلمان باید دیني علوم زده کړي ترڅو دنیوي او اخروي کامیابي ترلاسه کړي او همدارنګه عصري علوم فرض کفایې او دغو علومو ته توجه او زده کړه مو د نورو سیال او د هغوی له احتیاجه خلاصوي.
او له محصلینو څخه یې غوښتنه وکړه چې خپلو زده کړو ته زیاته توجه وکړي، وخت بې ځایه تېر نه کړي او له تعصب او قوم پرستۍ څخه جداً ډډه وکړي.
او ټینګار یې وکړ چې باید د اسلامي نظام قوانین او اصول په خاص ډول د محصلینو ژمنلیک په منظم ډول پر خپلو ځانونو تطبیق کړي.
وروسته د یاد پوهنځي استاد پوهندوی احسان الله شهامت نویو محصلینو ته د پوهنتون د علمي چاپېریال، د شرعیاتو پوهنځي د تحصیلي پروګرامونو، درسي بهیر، د محصلینو حقوقو او مسؤولیتونو، حاضري، نظم او ډسپلین او د علمي او فرهنګي فعالیتونو په اړه لازم معلومات وړاندې کړ.
همدارنګه پر نویو محصلینو ټینګار وشو، چې له فرصتونو څخه په اغېزمنه توګه ګټه واخلي، خپلو زدهکړو ته جدي پاملرنه وکړي، د استادانو لارښوونې په پام کې ونیسي او د علمي، اخلاقي او اسلامي ارزښتونو په رعایت سره د خپل تحصیلي مسیر د بریالیتوب لپاره هڅې وکړي.
باید وویل شي چې هرکال دغه پوهنتون ته د نوو بریالي شوو محصلینو لپاره د پوهنتون پېژندنې او له تحصیلي چاپیریال سره د بلدتیا برنامې ترسره کیږي.
د نشراتو او عامه اړیکو عمومي مدیریت
سه شنبه
۱۴۴۸/۰۲/۲۷ هـ.ق
۱۴۰۵/۰۵/۲۰ هـ.ش
۲۰۲۶/۰۸/۱۱م
