غزني پوهنتون کې استادانو ته په علمي، تدریسي او څېړنیزو چارو کې د نوښت او ابتکار اړوند علمي سمینار وړاندې شو.
غزني پوهنتون کې د استادانو د مسلکي پرمختیا( PDC ) آمریت له لوري استادانو ته د خپلو علمي، تدریسي او اداري چارو د لا ښه والي او اغېزمنتیا په موخه، د نوښت او ابتکار تر سرلیک لاندې علمي او معلوماتي سمینار وړاندې شو.
دغه سمینار د اقتصاد پوهنځي استاد پوهندوی احسان الله سعید وړاندې کړ؛ چې پرمهال یې ګډونوالو ته د نوښت او ابتکار مفهوم، ارزښت، اړتیا، د نوښتګر فکر د رامنځته کولو لارې چارې او په ورځنیو چارو کې د نوښتیزو کړنو د پلي کولو پر اهمیت هر اړخیز معلومات وړاندې کړل. او همداراز یې استادانو ته د ستونزو د نوښتیزو حللارو موندلو، خلاقانه فکر پیاوړتیا او د علمي او مسلکي فعالیتونو د کیفیت لوړولو په اړه لازم معلومات وړاندې کړل.
د سمینار موخه دا وه چې د استادانو د نوښتګر فکر د پیاوړتیا ترڅنګ، په علمي او مسلکي چارو کې د ابتکاري نظریاتو د رامنځته کېدو او عملي کېدو زمینه لا پراخه شي.
د نشراتو او عامه اړیکو عمومي مدیریت
یکشنبه
۱۴۴۸/۰۴/۲۱ هـ.ق
۱۴۰۵/۰۷/۱۲ هـ.ش
۲۰۲۶/۱۰/۰۴م
