غزني پوهنتون کې فرهنګي کمېټې د عالیقدر أمیرالمؤمنین حفظهالله تعالی د فرمانونو د اغېزمن تطبیق او د عامه پوهاوي ترسره کولو په موخه خپله ناسته ترسره کړه.
غزني پوهنتون کې فرهنګي کمېټې د عالیقدر أمیرالمؤمنین حفظهالله تعالی ورعاه د فرمانونو د ښه تطبیق او په اړوند يې د عامه پوهاوي د پیاوړتیا په موخه ناسته ترسره کړه.
د ناستې پیل د قرآن کریم د مبارکو آیتونو په تلاوت سره وشو.
ورپسې د محصلانو چارو مرستیال او د یادې کمېټې مسؤل مفتي عزت الله نوري ګډونوالو ته د ناستې د اهدافو په اړه معلومات ورکړل او ویې ویل چې د عالیقدر أمیرالمؤمنین حفظهالله تعالی فرمانونه د ټولنې د اصلاح، د اسلامي ارزښتونو د ژوندي ساتلو او د شرعي اصولو د پلي کولو لپاره واضحي لارښوونې دي، چې هر افغان باید د هغې د تطبیق برخوال وي.
ورپسې د دغي کمېټې غړو د فرمانونو پر اغېزمن تطبیق او د عامه پوهاوي په ترسره کولو خبرې اترې وکړې او د عملي کولو د لارو چارو په اړه یې خپلې نظریې وړاندې کړې. همداراز یې د محصلینو لپاره په راتلونکې کال کې د عامه پوهاوي سمینارونو په ترسره کولو د فرمانونو په بنرونو کې د چاپ او د ټولنیزو رسنیو له لاري یې په نشر باندې خپل نظریات شریک کړل، او پرېکړه یې وکړه چې فرهنګي کمېټه به د فرمانونو د لا زیات عامه کولو لپاره ځانګړې تعلیمي، تبلیغي او فرهنګي برنامې طرحه او عملي کړي، څو د ټولنې هر قشر ته د اسلامي نظام د اصولو او د عالیقدر أمیرالمؤمنین حفظه الله تعالی ورعاه د لارښوونو پیغام په ښه ډول ورسول شي.
د نشراتو او عامه اړیکو عمومي مدیریت
نېټه: شنبه
۱۴۴۷هـ.ق، د شعبان ۲۶ مه
۱۴۰۴هـ.ش، د دلوې ۲۵ مه
۲۰۲۶م، د فبروري ۱۴ مه
