غزني پوهنتون کې د ښوونې او روزنې پوهنځي استادانو ته د علمي مقالو د خپرولو لپاره د مناسب ژورنال د موندلو په موخه معلوماتي سمینار ترسره شو.
غزني پوهنتون کې د ښوونې او روزنې پوهنځي له خوا د علمي مقالو د خپرولو او د مناسب ژورنال موندلو په موخه معلوماتي سمینار ترسره شو. یاد سمینار د پوهنځي د استادانو د علمي ظرفیت د پیاوړتیا او د څېړنو د نړیوالو معیارونو سره د همغږۍ په موخه تنظیم شوی و.
دغه سمینار د ښوونې او روزنې پوهنځي د تاریخ څانګې استاد پوهنمل دوکتور محمد شریف ادیب له لوري وړاندې شو.
نوموړي د نړیوالو علمي ژورنالونو د ډولونو، د اعتبار ارزونې معیارونو (لکه impact factor، Scopus، او ISI indexing)، او د مقالو د استولو تخنیکي او اخلاقي اصولو په اړه تفصيلي معلومات وړاندې کړل. ګډونوالو ته دا هم وښودل شوه چې څنګه کولای شي د خپلو څېړنو لپاره مناسب ژورنالونه وپېژني او د جعلي یا غیراعتباري ژورنالونو له خپرولو څخه ځان وساتي.
په ورته مهال د سمینار ګډونوالو ته د پوښتنو کولو وخت هم ورکړل شو چې په پایله کې د ښاغلي ادیب له لوري د دوی پوښتنو ته قانع کوونکي ځوابونه ورکړل شول.
په پای کې برخوالو د دا ډول علمي پروګرامونو د دوام غوښتنه وکړه او ټینګار یې وکړ چې د علمي لیکنې او څېړنې په برخه کې منظمې روزنیزې برنامې د پوهنتون د علمي کچې د لوړوالي لپاره خورا ارزښت لري.
باید وویل شي چې د غزني پوهنتون مسؤلین د علمي څېړنو د ودې، د استادانو د مسلکي روزنې او د نړیوالو علمي معیارونو د پلي کولو لپاره بېلابېلې هڅې کوي، او دغه سمینار یې د همدې لړۍ یوه مهمه برخه بلل کېږي.
د نشراتو او عامه اړیکو عمومي مدیریت
نېټه: یکشنبه
۱۴۴۷هـ.ق، د شعبان ۲۰ مه
۱۴۰۴هـ.ش، د دلوې ۱۹ مه
۲۰۲۶م، د فبروري ۸ مه
