غزني پوهنتون کې د علمي څېړنو او مجلې معاونیت ته نوي مرستیال معرفي او رسماً یې خپلې چارې پیل کړې

غزني پوهنتون کې د علمي څېړنو او مجلې معاونیت ته ښاغلی پوهندوی دوکتور دریاخان هڅاند د نوي مرستیال په حیث د یوې غونډې په ترڅ کې د مسؤلینو  له لوري معرفي او خپلې چارې یې رسماً پیل کړې.
په همدې مناسبت جوړو شوو مراسمو کې عمومي رئیس شیخ مولوي عبدالمالک محسن مسؤلیت یو امانت وبلل، او زیاته یې کړه چې علمي څېړنې، د پوهنتون علمي پرمختګ او د مجلې چارو پیاوړتیا د لوړو زده کړو بنسټونو له اساسي لومړیتوبونو څخه شمېرل کېږي نو باید د څېړنیزو فعالیتونو د پراختیا، علمي نوښتونو د ملاتړ او د پوهنتون د علمي مجلې د لا معیاري کېدو لپاره اغېزمن ګامونه پورته شي.
همداراز د علمي چارو مرستیال هم د نوي مرستیال ټاکنه یو مثبت ګام وباله او هیله یې څرګنده کړه، چې د نوموړي په مشرۍ به د علمي څېړنو او مجلې معاونیت خپلې چارې لا اغېزمنې او منظمې پرمخ یوسي.
په ورته مهال دوکتور هڅاند هم د باور له امله د پوهنتون له رهبرۍ مننه وکړه او ډاډ یې څرګند کړ، چې خپلې ورسپارل شوې دندې به د اصولو، ژمنتیا او همغږۍ له مخې پرمخ وړي. نوموړي وویل د مسؤلینو په همکارۍ سره به هڅه وکړي چې د استادانو، محصلینو او څېړونکو لپاره مناسب علمي چاپېریال رامنځته، څېړنیزې برنامې لا پیاوړې؛ او د پوهنتون علمي لاسته راوړنې په ښه ډول منعکس کړي.
د یادونې وړ ده، چې غزني پوهنتون د هېواد له مهمو علمي بنسټونو څخه شمېرل کېږي او په بېلابېلو علمي، تحصیلي او څېړنیزو برخو کې د پام وړ فعالیتونه ترسره کوي.

د نشراتو او عامه اړیکو عمومي مدیریت
نېټه: یکشنبه
۱۴۴۷هـ.ق، ذوالقعدة الحرام ٩ مه
۱۴۰۵هـ.ش، ثور ٦ مه
۲۰۲۶م، اپریل ٢٦ مه