غزني پوهنتون کې د مالي او اداري چارو معاونیت نوبتي ناسته ترسره شوه؛ چې د پوهنتون د چارو لا پرمختګ، اداري نظم او شفافیت په اړه بحث او اړینې پرېکړې وشوې.
قمري نېټه: شوال ١١، ۱۴۴۶ هـ.ق
لمريز نېټه: وری ٢١، ۱۴۰۴ هـ.ش
مېلادي نېټه: اپرېل ٩، ۲۰۲۵م
نن د غزني پوهنتون د مالي او اداري چارو معاونیت ناسته د مالي اداري چارو د مرستیال مولوي محمد جاوید خالد په مشرۍ تر سره شوه، چې د یاد معاونیت ټولو اداري کارکوونکو پکې ګډون درلود.
ناسته د قرآن کریم د مبارکو آیتونو په تلاوت سره پیل شوه. وروسته ښاغلي خالد د ناستې ټولو ګډونوالو ته د ښه راغلاست وینا وکړه. نوموړې د پوهنتون د تقدس، د کارکوونکو د مسؤلیتونو او اړینو اصلاحاتو په اړه مهمې او ارزښتناکې خبرې وکړې. هغه څرګنده کړه، چې پوهنتون ته زموږ راتګ باید یوازې د الله جل جلاله د رضا لپاره وي، نه د شخصي یا مادي ګټو د ترلاسه کولو لپاره. نوموړې ټینګار وکړ، چې د پوهنتون ټول کارکوونکي باید خپل چلند د نبوي اخلاقو پر بنسټ سمبال کړي، څو ادارې چاپېریال مثبت، شفاف او د خدمت وړ وګرځي.
او زیاته یې کړه؛چې ټول آمریتونه او مدیریتونه مکلف دي، چې د تضمین کیفیت هغه معیارونه چې د لوړو زده کړو وزارت له لورې وضع شوي په پوره ډول رعایت او تطبیق کړی. یاد معیارونه د علمي پرمختګ، ښوونې او روزنې د کیفیت لوړولو او د پوهنتون د اعتبار د لوړولو لپاره یو حیاتي اقدام دی.
همدارنګه یې ټولو آمریتونو او مدیریتونو ته دنده ورکړه، چې د ۱۴۰۴ لمریز کال لپاره خپل عملیاتي او کاري پلانونه د واقعي اړتیاوو، او د تیر کال د تجربو پر بنسټ ترتیب کړي. دغه پلانونه باید مشخص، او د ارزونې وړ اهداف ولري. دا پلانونه به د پوهنتون د عمومي پلان برخه وي او د رهبرۍ لخوا به تعقیب شي.
تر څنګ یې، آمریتونه او مدیریتونه مکلف دي چې خپل ربعوار راپورونه د ټاکلي مهال وېش سره سم ترتیب او د اړوند معاونیت سره په خپل وخت شریک کړي.
د پوهنتون د پرمختګ لپاره د ځینو متفرقه موضوعاتو په اړه بحثونه وشول، او د اصلاحاتو، نظم، او شفافیت د لا ښه والي لپاره وړاندیزونه مطرح شول.
د نشراتو او عامه اړیکو عمومي مدیریت
