د غزني پوهنتون د ښوونې، روزنې او کرني پوهنځیو محصلینو د خپلو عملي زده کړو او مسلکي پوهې د لوړاوي په موخه کندهار پوهنتون ته علمي سفر ترسره کړ.
شنبه: ۲۸/جمادی الاول/۱۴۴۶ هـ.ق
۱۰/قوس/۱۴۰۳ هـ.ش
۳۰/نوامبر/۲۰۲۴ م
د غزني پوهنتون د ښوونې، روزنې او کرني پوهنځیو محصلینو د خپلو عملي زده کړو او مسلکي پوهې د لوړاوي په موخه کندهار پوهنتون ته علمي سفر ترسره کړ.
د دې سفر مشري د ښوونې او روزنې پوهنځي استاد، پوهندوی دوکتور احمدعلي کهزاد، کوله. چې د دغه علمي سفر په جریان کې، محصلینو لومړی د کندهار پوهنتون د ارواښاد علامه عبدالحی حبیبي له کتابتون څخه لیدنه وکړه. چې د یاد کتابتون د آمر له لوري د دغه کتابتون په اړه محصلینو ته هر اړخیز معلومات وړاندې کړل. سربېره پر دې، محصلینو د کتابتون له بېلابېلو برخو څخه لیدنه وکړه او یو شمېر کتابونه یې ولوستل.
ورپسې، محصلینو د ښوونې او روزنې پوهنځي د کیمیا، فزیک او بیولوژۍ څانګو له لابراتوارونو څخه لیدنه وکړه. هغوی ته په دې لابراتوارونو کې د عملي زده کړو اړوند وسایل او مواد ور وپېژندل شول.
همدارنګه، محصلینو د کمپیوټر ساینس پوهنځي د کمپیوټر لابراتوار څخه هم لیدنه وکړه، چې په ترڅ کې یې د کمپیوټر ساینس پوهنځي استادانو د لابراتوار په فعالیتونو او تجهیزاتو مفصل معلومات ورکړل. دې لیدنو د محصلینو د پوهې د پراختیا او عملي مهارتونو په لوړولو کې مرسته وکړه.
د نشراتو او عامه اړیکو عمومي مدیریت
