د غزني ولایت والي، د غزني پوهنتون رهبري، استادانو، کارکوونکو او محصلینو یوې پراخې غونډې ته د وینا ترڅنګ په پوهنتون کې له روانو زېربنايې پرژو څخه هم لیدنه ترسره کړه.
د غزني ولایت والي، الحاج ملا عبدالصمد جاوید د غزني پوهنتون له رهبرۍ، استادانو او محصلینو سره په یوې پراخې غونډه کې ګډون وکړ. دغه غونډه چې د پوهنتون د هر اړخیز پرمختګ او د استادانو، کارکوونکو او محصلینو د غوښتنو اورېدو په موخه جوړه شوې وه، د غزني پوهنتون د پرمختګ او راتلونکي پلانونو په اړه هم بحثونه او څرګندونې وشوې.
د غونډې د پیل پرمهال د علمي چارو مرستیال مولوي محمد حیدر حمزه د ښه راغلاست او هرکلي د وینا ترڅنګ له والي صاحب څخه ځانګړې مننه وکړه چې د پوهنتون د استادانو، کارکوونکو او محصلینو ستونزو ته رسېدنه کوي او د هغوئ غوښتنې له نیږدې څخه اوري.
وروسته والي صاحب د استادانو کارکوونکو او محصلینو جلا جلا غونډو ته د خپلو خبرو په ترڅ کې د پوهنتون د مقام او ارزښت په اړه خبري وکړې او زیاته کړه چې پوهنتونونه د ټولنیز، علمي او اقتصادي پرمختګ بنسټیز ډګرونه او محصلین د هیواد راتلونکي دي نو استادان دي محصلین په اسلامي فکر او روحیه سمبال وروزي څو د نظام په استحکام او د هیواد په ابادۍ کې برخه واخلي، دارنګه يې له استادانو او محصلینو غوښتنه وکړه چې د هیواد د ابادۍ په برخه کې خپلې مشورې، وړاندیزونه ورسره شریک کړي څو مو هیواد آباد او د نورو له بې ځایه فرمایشاتو او غوښتنو خلاص شي.
په ورته مهال د والي صاحب له استادانو او کارکوونکو سره د ځانګړي ناستې په ترڅ کې د ژبو او ادبیاتو پوهنځي استاد پوهنمل نقیب الله خانې خېل او د شرعیاتو پوهنځي رئیس شیخ عبدالمنان البدر د وینا پرمهال ډاډ څرګنډ چې استادان شپه او ورځ اماده دي چې د نظام د قوت او د هیواد د ابادۍ لپاره مسلکي کسان وروزي؛ او له والي صاحب څخه یې غوښتنه وکړه چې له پوهنتون سره دي د دوامداره ناستو او هغمږۍ لپاره یو بورډ جوړ او وخت په وخت دي ناستې ورسره ترسره کړې څو دغه پوهنتون ته ځانګړې پاملرنه وشي او همداراز يې د استادانو او محصلینو غوښتنو او وړاندیزونو ته د ځانګړې توجه غوښتنه هم ورڅخه وکړه.
د نشراتو او عامه اړیکو عمومي مدیریت
نېټه: سه شنبه
۱۴۴۷هـ.ق، ذوالقعدة الحرام ۱۱ مه
۱۴۰۵هـ.ش، ثور ۸ مه
۲۰۲۶م، اپریل ۲۸ مه
