غزني پوهنتون کې د فکري جګړې پېژندنې او لارو چارو تر عنوان لاندې د محصلینو فکري انجمن ترسره شو.
غزني پوهنتون کې د دعوت او ارشاد آمریت له لوري د محصلینو د فکري ودې او د معاصرو ننګونو د درک په موخه د “فکري جګړې پېژندنې او لارو چارو” تر عنوان لاندې فکري انجمن ترسره شو. په دې پروګرام کې د یاد آمریت مسؤلینو او یو شمېر محصلینو ګډون کړی و.
چې پرمهال یې ویناوالو د فکري جګړې مفهوم ته اشاره وکړه او ویې ویل چې په نننۍ نړۍ کې جګړې یوازې په فزیکي بڼه نه دي، بلکې فکري او کلتوري اړخونه یې هم خورا مهم دي. د دوی په وینا، د رسنیو، ټولنیزو شبکو او فرهنګي یرغلونو له لارې د ټولنو پر ذهنونو اغېز کول د فکري جګړې اساسي بڼه ده. همداراز یې د فکري جګړې د مخنیوي پر لارو چارو بحث وکړ او ټینګار یې وکړ چې ځوان نسل باید د علم، پوهاوي او انتقادي فکر له لارې ځانونه د داسې ګواښونو پر وړاندې چمتو کړي.
باید وویل شي چې یاد فکري انجمن د هري پنج شنبې په شپه د پوهنتون په مسجد کې په لیلیه کې د مېشتو محصلینو له لوري ترسره کیږي چې موضوعات د دعوت او ارشاد آمریت له لوري ورته انتخاب کیږي.
د نشراتو او عامه اړیکو عمومي مدیریت
نېټه: پنج شنبه
۱۴۴۷هـ.ق، شوال المکرم ۲۲ مه
۱۴۰۵هـ.ش، حمل ۲۰ مه
۲۰۲۶م، اپریل ۹ مه
