غزني پوهنتون کې د ځوان نسل فکري روزنې کتاب اخیستل شوي سیالۍ پایلي اعلان او ممتاز محصلين یې د یوې شانداره غونډې په ترڅ کې وستایل شول.
غزني پوهنتون کې د محصلانو چارو معاونیت له لوري د ځوان نسل فکري روزنې او د انحراف پر وړاندې یې زموږ مسؤلیتونه تر سرلیک لاندې کتاب اخیستل شوې سیالۍ پایلې نن ورځ اعلان او د لوړو نمرو اخیستونکي محصلین یې د یوې ځانګړي غونډې په ترڅ کې وستایل شول.
په دغه غونډه کې د محصلانو چارو مرستیال مفتي عزت الله نوري ، د علمي چارو مرستیال مولوي محمد حیدر حمزه ، د پوهنځیو رئیس صاحبانو ، یو شمېر استادانو او ګڼ شمېر محصلینو ګډون کړی وو.
غونډه د قرآن کریم د مبارکو آیتونو په تلاوت سره پیل شوه.
وروسته د محصلانو چارو مرستیال ښاغلي نوري د پرانېستونکې وینا په ترڅ کې د دغې سیالۍ موخه د محصلینو فکري روزنه، د هغوی د فکري او علمي ظرفیتونو لوړول، د مثبت فکر دودول او د سالم رقابت فرهنګ پیاوړی کول وبلل.
نوموړي زیاته کړه چې د ځوانانو فکري او علمي روزنه د هېواد د روښانه راتلونکي لپاره بنسټیز ارزښت لري، او پوهنتون هڅه کوي د داسې پروګرامونو له لارې د محصلینو استعدادونه راویښ او تقویه کړي.
وروسته د شرعیاتو پوهنځي رئیس شیخ عبدالمنان البدر د محصلینو د نوښتونو ستاینه وکړه او وویل چې د فکري روزنې سیالۍ نه یوازې د علمي سیالیو یوه برخه ده، بلکې د ځوان نسل د فکر، منطق او تحلیل د ځواک د ودې یو اغېزمن ګام دی او له محصلینو څخه یې غوښتنه وکړه چې لا نوري هڅي وکړي څو مو هیواد له نړیوالو سره د ټیکنالوژي په هره برخه کې سیال شي.
دارنګه د ممتازو محصلینو په نماینده ګې هم څو تنو محصلینو د ځوان نسل د فکري جوړښت اړوند خبرې وکړې او د داسې معنوي او فکري پروګرامونو د دوام غوښتنه یې وکړه.
په پای کې، د مسؤلینو له لوري لس تنه د لوړو نمرو اخیستونکې او ممتاز محصلین د ځانګړو ډالیو ،ستاینلیکونو او ترتیب شوو چپانو په وېش سره ونازول شول.
د نشراتو او عامه اړیکو عمومي مدیریت
١٤ جمادی الاول ۱۴۴۷ هـ.ق— ١٤ عقرب ۱۴۰۴ هـ.ش
