غزني پوهنتون کې د چاپیریال د ښکلا او سرسبزۍ په موخه د نیالګیو د کېنولو لپاره د خط اچونې پروسه ترسره شوه.
غزني پوهنتون کې د چاپېریال د ښکلا، سرسبزۍ او سالمې فضأ د رامنځته کولو په موخه، د نیالګیو د کېنولو لپاره د خط اچونې (لاین کولو) پروسه ترسره شوه. دا پروسه د پوهنتون د سرسبزۍ او چاپېریالي پرمختګ د دوامدارو هڅو یوه مهمه برخه ده. یاده پروسه د کرنې پوهنځي د څو متخصصو او باتجربه استادانو له لورې ترسره شوه چې له مخې به يې د پوهنتون په بېلابیلو برخو کې نوي نیالان او زینتي بوټي کېنول شی.
په ورته مهال د مالي او اداري چارو مرستیال الحاج شیخ عبدالهادي ذوالهادي وویل: موږ هڅه کوو چې پوهنتون مو نه یوازې د علم او زدهکړې مرکز وي، بلکې د سرسبز چاپېریال یو ژوندی مثال هم وي. د نیالګیو کرل زموږ د راتلونکو نسلونو لپاره د سوکاله او پاک طبیعت په لور یو ګام دی.
نوموړي زیاته کړه چې د نیالګیو اصلي کېنول به د راتلونکو ورځو په اوږدو کې د موسمي شرایطو په پام کې نیولو سره پیل شي.
باید وویل شي چې د غزني پوهنتون مسؤلین ژمن دي چې د شنو ساحو د پراختیا دا لړۍ به دوامداره وساتي او د هر پسرلي په موسم کې به نوي نیالګي کېنوي، څو پوهنتون لا ډېر ښکلی، پاک او ژوندی پاتې شي.
د نشراتو او عامه اړیکو عمومي مدیریت
نېټه: دوشنبه
۱۴۴۷هـ.ق، رمضان المبارک ۶ مه
۱۴۰۴هـ.ش، حوت ۴ مه
۲۰۲۶م، فبروري ۲۳ مه
