د غزني پوهنتون لپاره نوی ماسټر پلان او تفصیلي پلان بشپړ او په نیږدې راتلونکې کې به له دغه پوهنتون سره په رسمي ډول شریک کړل شي.
د غزني پوهنتون د مالي او اداري چارو معاونیت په هڅو د دغه پوهنتون د پرمختګ لپاره نوی ماسټر پلان او تفصیلي ساختماني نقشې بشپړې شوې دي او ټاکل شوې چې په نېږدې راتلونکې کې به له پوهنتون سره په رسمي ډول شریک کړل شي.
د دغه پلان هدف د غزني پوهنتون د فزیکي پراختیا ترڅنګ، د تحصیلي خدمتونو کچه لوړول، د څېړنې امکانات پیاوړي کول او محصلینو ته د معیاري علمي چاپېریال برابرول دي.
د ماسټر پلان په جوړولو کې د پوهنتون ستراتیژیک اهداف، د راتلونکو کلونو اړتیاوې، د درسي پوهنځیو پراختیا، د لابراتوارونو او کتابتونونو پیاوړتیا، د محصلینو د استوګنځایونو پراخې شبکې، ورزشي میدانونه او د اداري چارو د عصري سیستم جوړول په پام کې نیول شوي دي.
یاد پلان چې د غزني ولایت د ښار او کور جوړولو ریاست د تخنیکي ټیمونو او انجنیرانو له لوري ډیزاین او ترتیب شوي د اړوند، وزارت له رسمي تائیدي وروسته به له غزني پوهنتون سره شریک کړل شي.
په ورته مهال د مالي او اداري چارو مرستیال الحاج شیخ عبدالهادي ذوالهادي هم دغه مهم پرمختګ د پوهنتون د پراختیا لپاره یو ستر فرصت بولي او هیله څرګندوي چې د پروژو د عملي کېدو په نتیجه کې به د پوهنتون اداري او تدریسي ودانۍ، حلقوي سرکونه او شنې ساحې په منظم او اساسي ډول او له ځنډ او خنډ پرته جوړي کړي.
باید وویل شي چې د غزني پوهنتون د نوي ماسټر پلان سره سم به د دغه پوهنتون د سرکونو، پلو لارو او شنوساحو چارې به ژر پیل او په اساسي ډول به ورغیږي.
د نشراتو او عامه اړیکو عمومي مدیریت
شنبه ، ۱ جمادی الثانی ۱۴۴۷ هـ.ق— ۱ قوس ۱۴۰۴ هـ.ش
