غزني پوهنتون کې له محصلینو څخه د دوحې تړون اړوند کتاب ازموینه واخیستل شوه.
غزني پوهنتون کې د محصلانو چارو معاونیت له لوري له محصلینو څخه د دوحې تړون کتاب اړوند ځانګړې ازموینه واخیستل شوه.
د ازموینې د پیل پرمهال د محصلانو چارو مرستیال مفتي عزت الله نوري وویل چې د دوحې تړون د افغانستان د روان وضعیت په سیاسي جوړښت مهم اغېز درلود ، نو اړینه وه چې محصلین د څېړنو او تحلیلي فکر پر مټ د دغه تړون ټولې حقوقي، تاریخي او اجرايي برخې په ژوره توګه وپېژني. دوی زیاته کړه چې محصلین باید وکولای شي د سیمې د سیاست له بدلونونو سره سم، دقیق تحلیل وړاندې کړي او د هیواد د ثبات په برخه کې علمي رول ولوبوي.
محصلینو د ازموینې په اړه د خوښۍ ترڅنګ وویل چې دا ډول علمي پروګرامونه د دوی د تخصصي مهارتونو د لوړولو، د ملي موضوعاتو د درک کولو او د هېواد د راتلونکي لپاره د مسوولانه فکر روزلو په برخه کې مهم بنسټ جوړوي.
دغه ازموینه د علمي اصولو پر بنسټ په منظم ډول ترسره شوه او د پایلو پر بنسټ به غوره زده کوونکي د ستاینلیکونو او تشویقي برنامو له لارې وستایل شي.
د نشراتو او عامه اړیکو عمومي مدیریت
شنبه، ۳ جمادی الاول ۱۴۴۷ هـ.ق— ۳ عقرب ۱۴۰۴ هـ.ش
