غزني پوهنتون کې د کرنې پوهنځي استادانو او محصلینو په ګډه د چاپېریال ساتنې او د دغه پوهنځي د ښکلا او پاکوالي په موخه د عمومي اشر پروګرام ترسره کړ.

قمري نېټه: صفرالمظفر، ۲۹، ۱۴۴۷ هـ.ق
لمريز نېټه: سنبله، ۱ ، ۱۴۰۴ هـ.ش
مېلادي نېټه: اګست، ۲۳ ، ۲۰۲۵م

غزني پوهنتون کې د کرنې پوهنځي استادانو او یو شمېر محصلینو په ګډه د چاپېریال ساتنې او د یاد پوهنځي د ښکلا او پاکوالي په موخه د عمومي اشر پروګرام ترسره کړ.
یاد اشر د کرنې پوهنځي د رهبرۍ په ابتکار او د استادانو په لارښوونه د محصلینو په پراخ ګډون ترسره شو. په دې پروګرام کې د پوهنځي انګړ، درسي ټولګي، دهلېزونه او شاوخوا ساحې له کثافاتو پاکې؛ او د چاپېریال د ښکلا لپاره لازم کارونه ترسره شول.

په ورته مهال د کرنې پوهنځي د نظم او ډسیپلین کمېټې مسؤل پوهنمل استاد حبیب الله فیضي د اشر پر مهال وویل چې د چاپېریال پاکوالی نه یوازې د زده کړې او تدریس لپاره مناسبه فضأ برابروي، بلکې د روغتیا او ټولنیز ژوند په ښه والي کې هم مهم رول لري. هغوی زیاته کړه چې د داسې ګډو پروګرامونو دوام به د محصلینو تر منځ د ګډ کار او ټولنیزې همکارۍ روحیه نوره هم پیاوړې کړي.
محصلینو هم د اشر په اړه خپلې خوښۍ څرګندې کړې او ژمنه یې وکړه چې د خپل پوهنځي د پاکوالي او سمون په برخه کې به تل ونډه اخلي.
غزني پوهنتون تل هڅه کوي ترڅو د علمي پروګرامونو ترڅنګ، د ټولنیزو او فرهنګي ارزښتونو په ترویج کې هم رغنده رول ولوبوي.

د نشراتو او عامه اړیکو عمومي مدیریت