د لوړو زده کړو سرپرست وزیر غزني پوهنتون کې ستري غونډي ته د وینا تر څنګ د دغه پوهنتون له مسؤلینو، استادانو او د محصلینو له نمائنده ګانو سره جلا جلا ناستي وکړې او د هغوی غوښتني او ستونزي یې له نیژدې واوریدې او د حل ډاډ یې ورکړ.
دوشنبه : ۱۶/جمادی الاول/۱۴۴۶ه.ق
۲۸/عقرب/۱۴۰۳ه.ش
۱۸/نوامبر/۲۰۲۴م
نن ورځ د لوړو زده کړو سرپرست وزیر محترم شیخ الحدیث مولوي ندامحمد ندیم غزني ولایت ته د رسمي سفر پرمهال په غزني پوهنتون کې په همدې پار جوړ شوو شاندارو مراسمو کې د ګډون ترڅنګ د دغه پوهنتون له مسؤلینو، استادانو او د محصلینو له نماینده ګانو سره د جلاجلا ناستو په ترڅ کې د هغوی غوښتني او مشکلات له نیژدې واوریدل او د حل ډاډ یې ورکړ.
ننۍ غونډه چې پکي د لوړو زده کړو وزیر محترم شیخ الحدیث مولوي ندامحمد ندیم او ورسره مل پلاوي، د غزني ولایت والي حافظ محمد آمین عمري او ورسره مل پلاوي، د امنیه قومنداني قومندان او امنیتي غړو، د ولایتي ادارو رئیسانو، د جهادي مدرسې استازو، د دولتي او خصوصي پوهنتونونو مسؤلینو، استادانو او محصلینو ګډون کړی وو غونډه د کلام الله په مبارکو آیاتونو پیل.
ورپسې د لوړو زده کړو سرپرست وزیر محترم شیخ الحدیث مولوي نداء محمد ندیم، غزنی یو تاریخي ولایت وباله او د علم د ارزښت په تړاو یې وویل، چې انسان په خپل ژوند کې دوه هدفه تعقیبوي، یو اصلي هدف دی او بل هغه هدف دی چې د اړتیا په اساس ټاکل کیږي او رسېدل ورته د علم له لارې ترسره کیږي.
هغه د محصل اهمیت ته په اشارې وویل: «موږ نه غواړو چې له تاسو نظامي عسکر او یا د مدرسې طالبان جوړ کړو، بلکې غواړو چې ته داسې انجنیر یا ډاکټر شې چې د خپل مسلک ترڅنګ په دین او قرآن هم پوه شې، څو په پوره ایماندارۍ له خپل مسلک څخه دفاع او له دې لارې د دین او خلکو خدمت وکړې.»
نوموړي دغه راز وويل، له لاسه وتلي اسلامي ارزښتونه را ژوندي کول، د دین پیروي او د خلکو تر منځ اتحاد او اتفاق رامنځته کول د اسلامي نظام غوښتنه ده او له محصلينو يې وغوښتل، چې نصيحتونو ته جدي پاملرنه او د خپلو درسونو په څېر تعقیب کړي.
د لوړو زده کړ سرپرست وزیر همداراز وویل چې امیرالمؤمنین حفظه الله تعالی له ما څخه وغوښتل چې یو داسې محصل ولرم چې لوړ سند او ښه عملنامه ولري، هغه زیاته کړه چې محصل باید په خپل مسلک کې لیاقت او استعداد او د مسلک تر څنګ بايد د خپل دين په برخه کې هم کار وکړي او په ديني چارو کې ځان پوه کړي، څو ښه دنيا او آخرت ولري.
وروسته د غزني ولایت والي الحاج حافظ محمد آمین عمري غونډي ته، د خبرو پر مهال شېخ صاحب ته د ښه راغلاست او هرکلي ترڅنګ، ورڅخه مننه وکړه چې وخت په وخت یې د محصلینو ستونزو ته رسیده ګي کړي ده او د دوی ستونزي یې له نېژدې اوریدلي او زیاته یې کړه چې اوس په ټول هیواد کې سرتا سري امن دي نو هر څوک کولای شي زده کړو کاروبار او خپل ژوند ته د امن په فضأ کې دوام ورکړي او له محصلینو څخه یې غوښتنه وکړه چې اوس باید خپل هیواد، ولایت او خپلي ټولني ته خدمت وکړو او د ابادي لپاره یې شپه او ورځ پر ځان یوه کړو.
همدارنګه د غزني پوهنتون عمومي رئیس الحاج مولوي عبدالواسع منصور ننۍ غونډي ته د خبرو پرمهال وویل چې د مؤمن مسلمان صفت امربالمعروف او نهي عن المنکر ده، او زیاته یې کړه چې د غزني پوهنتون مسؤلینو، استادانو، کارمندانو او محصلینو د خپلو امراوو توصیو ته لبیک ویلي او خپل ځانونه یې په شریعت برابر کړي او یادونه یې وکړه چې مخکي د پوهنتون او مدرسې ترمنځ چې کوم فکري بعد راغلی وو د اسلامي نظام په راتګ سره ختم او ترڅنګ یې ورورګلوي، اخوت، مینه او محبت راغلی، نو اوس یې باید د علم، پوهي او قلم په واسطه همداسي وساتو.
او په اخیر کې د جهادي مدرسې معاون مفتي احمد سعید وویل چې اسلام د فطرت، ورورګلوي او پرمختګ دین ده نو باید اسلام د ژوند په هره برخه کې تطبیق کړو او ویې ویل چې موږ تاسو باید د نظام د حفاظت ترڅنګ خپل فرهنګ وساتو.
د نشراتو او عامه اړیکو عمومي مدیریت
