د غزني پوهنتون علمي او څېړنیزې مجلې د غوره کړنو او باکیفیته څېړنو د خپرولو په پایله کې د دوهمې درجې علمي اعتبار لیک ترلاسه کړ.
غزني پوهنتون علمي او څېړنیزې مجلې ته د لوړو زده کړو وزارت اړوند د څېړنې، تألیف او ترجمې ریاست له لوري د علمي معیارونو د پلي کولو، باکیفیته څېړنو د خپرولو او د اکاډمیکو اصولو د مراعتولو په برخه کې د خپلو پرلهپسې هڅو او لاسته راوړنو له امله د ارزونې په وروستي بهیر کې د دوهمې درجې علمي اعتبار لیک ورکړل شو.
دا بریا د دې مجلې د مسؤلینو، علمي پلاوي، لیکوالانو او ارزونکو ګډو هلو ځلو پایله ده، چې د علمي څېړنو د پراختیا، د نوو علمي نظریاتو د ترویج او د څېړنیز چاپېریال د پیاوړتیا لپاره یې دوامدار کار کړی دی. د غزني پوهنتون علمي او څېړنیزې مجلې هڅه کړې چې د ملي او نړیوالو علمي معیارونو سره سم، کره، نوښتګرې او د ټولنې اړتیاوو ته ځواب ویونکې څېړنې خپرې کړي.
په ورته مهال د پوهنتون مشرتابه هم د یادې لویې علمي لاسته راوړنې هرکلی وکړ؛ او دا یې د غزني پوهنتون د علمي اعتبار د پیاوړتیا په لور یو مهم ګام وبلل. همدارنګه ټینګار وشو، چې په راتلونکي کې به د مجلې د کیفیت د لا لوړولو، د علمي رتبو د ښه کولو او د څېړنې د کچې د پراختیا لپاره به نورې هڅې هم ترسره شي.
غزني پوهنتون ژمن دی چې د علم، څېړنې او نوښت په برخه کې خپلې هڅې لا پراخې کړي او د هېواد د علمي پرمختګ لپاره اغېزمن رول ولوبوي.
د نشراتو او عامه اړیکو عمومي مدیریت
یکشنبه ، ۳۰ جمادی الثاني ۱۴۴۷ هـ.ق— ۳۰ قوس۱۴۰۴ه ش
