د غزني پوهنتون د دعوت او ارشاد آمریت له لوري د قرآن کریم د تفسیر او ترجمې درسونه پیل شول.
نېټه او ورځ:
چهارشنبه، ۱۶ جمادیالثاني ۱۴۴۶ هـ ق
۲۸ قوس ۱۴۰۳ هـ ش
۱۸ دسمبر ۲۰۲۴ م
د غزني پوهنتون د دعوت او ارشاد آمریت په نوښت د قرآن کریم د تفسیر او ترجمې درسونو لړۍ په رسمي ډول پیل شوه. د دې علمي پروګرام پرانیسته د غزني پوهنتون د رئیس، الحاج مولوي عبدالواسع منصور، په مشرۍ د پوهنتون د ټولو مسؤلینو او استادانو په ګډون ترسره شوه.
د پروګرام د پیل موخه د پوهنتون د مسؤولینو د دیني پوهې لوړول او هغوی ته د قرآن کریم د مفاهیمو دقیقه او ژوره تشریح وړاندې کول دي. د غونډې په پیل کې د پوهنتون رئیس، الحاج مولوي عبدالواسع منصور، ګډونوالو ته د دې پروګرام د اهمیت په اړه خبرې وکړې. هغه په خپله وینا کې وویل: د قرآن کریم زده کړه او د هغه پر اصولو عمل کول زموږ د ټولنې د اصلاح او پرمختګ لپاره کلیدي رول لري.
یاد درسونه به په اونۍ کې دوه ورځې، د سه شنبې او چهارشنبې په ورځو، د ماسپښین له لمانځه وروسته ترسره کېږي.
د غونډې په پای کې د پوهنتون رئیس له ټولو مسؤلینو وغوښتل چې په منظم ډول په دې پروګرام کې ګډون وکړي او ترلاسه شوې دیني پوهه په خپلو ورځنیو چارو کې عملي کړي.
د نشراتو او عامه اړیکو عمومي مدیریت
