د غزني پوهنتون استادانو ته په لیکنو او مقالو کې، د ادبي غلا د مخنیوي په موخه د Turnitin سافټویر پیژندنې اړوند معلوماتي سیمینار وړاندې شو.
ورځ: یکشنبه
شعبان المعظم ١٧ مه، ۱۴۴٦ه ق
سلواغې ٢٨ مه، ۱۴۰٣ه ش
فبروري ١٦ مه، ۲۰۲۵ م
نن ورځ د غزني پوهنتون د څیړنو او علمي مجلې معاونیت له لوري د استادانو لپاره په لیکنو، مقالو او تیزسونو لیکلو کې د ادبي غلا د مخنیوي په موخه د Turnitin سافټویر پیژندنې اړوند علمي او معلوماتي سیمینار وړاندې شو.
یاد سیمینار د علمي مجلې عمومي مدیر ښاغلي احمد شاه تکل وړاندې کړ، چې پکې یې د Turnitin سافټویر پیژندنه، تاریخي مخینه، او د دې سافټویر د کارونې ګټې او موثریت په اړه هر اړخیز معلومات وړاندې کړل.
د سیمینار موخه د استادانو د علمي اثارو د اصالت ساتنه، د ادبي غلا مخنیوی، او په نړیوالو معیارونو برابرې څیړنې ترسره کول وو. ګډونوالو د سافټویر د ګټو په اړه مفصل معلومات تر لاسه کړل او د عملي کارونې په اړه یې پوښتنې وکړې.
چې وروسته د څېړنو او علمي مجلې معاون پوهنمل عبدالمتین "میاڼي" له لوري په دغه سافټویر کې د یوزر اکاونټ جوړولو برخه عملاً تشریح او اړوندو استادانو او مسؤلو کسانو ته یې پکې اکاونټونه جوړ کړل.
دغه علمي غونډه د غزني پوهنتون د څیړنو د کیفیت لوړولو په لاره کې یو اغېزمن ګام ګڼل کیږي.
د نشراتو او عامه اړیکو عمومي مدیریت
