د غزني پوهنتون استادانو، اداري کارکوونکو او محصلینو ته د ناسمو رواجونو د مخنیوي په تړاو د عالیقدر امیرالمؤمنین حفظه الله تعالی د فرمان د ابلاغ او ښه پوهاوي اړوند یوه ورځنی سیمینار ترسره شو.
قمري نېټه: شوال ١٨، ۱۴۴۶ هـ.ق
لمريز نېټه: وري ٢٧، ۱۴۰۴ هـ.ش
مېلادي نېټه: اپرېل ١٦، ۲۰۲۵
نن ورځ د غزني پوهنتون رهبري، استادانو، اداري او خدماتي کارکوونکو او محصلینو ته د خوښیو، ودونو، مصیبتونو، او د حج او عمرې څخه د راستنېدو پر مهال د ناسمو رواجونو د مخنیوي په اړه د عالیقدر امیرالمؤمنین حفظه الله تعالی فرمان د تشریح او عامه پوهاوي په موخه معلوماتي سیمینار ترسره شوه .
یاد فرمان، چې د قرآني مبارکو آیتونو او نبوي مبارکو حدیثونو په رڼا کې ترتیب شوی، په اسلامي ټولنه کې د ناسمو رواجونو بېلابېلې بېلګې او د هغوی د مخنیوي دلایل په کې په تفصیل سره بیان شوي دي.
دغه فرمان د یاد پوهنتون د دعوت او ارشاد آمریت په هڅو، د دغه پوهنتون د عمومي رئیس الحاج مولوي عبدالواسع منصور له لوري تشریح او په ټولنه کې د ناوړه رواجونو په اړه يې معلومات وړاندې کړل. او هم مهاله یې کمېټه جوړه او دنده ورکړل شوه ترڅو دغه فرمان د غزني پوهنتون په استازولي په ټولو ریاستونو عمومي اداراتو، مساجدو او عامه ځایونو کې تشریح او خلکو ته یې د تطبیق اړوند عامه پوهاوی ورکړي.
او دارنګه یې د ننۍ ناستې له ټولو ګډونوالو غوښتنه وکړه چې دغه فرمان ښه مطالعه، او پر خپلو ځانو تر تطبیق وروسته د ټولنې نورو ګړو ته په ښه توګه ورسوي تر څو اسلامي ټولنه د ناسمو رواجونو څخه پاکه او ناوړه رواجونه ختم شي.
مجلس په دعا یې سره پای ته ورسید.
د نشراتو او عامه اړیکو عمومي مدیریت
