غزني پوهنتون کې د اداري کارکوونکو د تخنیکي مهارتونو د لوړاوي په موخه د ایکسل پروګرام لس ورځنی روزنیز سمینار پای ته ورسېد.
غزني پوهنتون کې د مالي او اداري چارو معاونیت اړوند د کارکوونکو چارو آمریت د ګمارنې عمومي مدیریت له لوري د اداري کارکوونکو د تخنیکي مهارتونو د لوړاوي په موخه د ایکسل پروګرام لس ورځنی روزنیز سمینار، چې لس ورځې وړاندې پیل شوی و، په بریالیتوب سره پای ته ورسېد.
د دغه سمینار موخه د اداري کارکوونکو د مسلکي وړتیاوو لوړول او د عصري اداري سیستمونو سره د هغوی بلدتیا زیاتول وو.
د دغه سمینار د پای ته رسېدو پر مهال د مالي او اداري چارو مرستیال الحاج شیخ عبدالهادي ذوالهادي، د کمپیوټر د ارزښت او د عصري ټکنالوژۍ د اهمیت په اړه په خپلو اغېزمنو او الهام بخښونکو خبرو کې زیاته کړه چې نننۍ نړۍ د پوهې او مهارتونو نړۍ ده، او هغه څوک بریالي دي چې له نوې ټکنالوژۍ سره ځان عیار کړي. نوموړي وویل چې کمپیوټر یوازې یو وسیله نه ده، بلکې د پرمختګ، چټکتیا او د کار د اسانتیا مهمه سرچینه ده، چې د اداري چارو په سمون او اغېزمنتیا کې بنسټیز رول لري.
د سیمینار په جریان کې ګډونوالو ته د ایکسیل بنسټیز او پرمختللي مهارتونه، د معلوماتو تنظیم، تحلیل، راپور جوړونه او د اداري چارو د چټکتیا لپاره د دې پروګرام اغېزمن استعمال وروښودل شو.
ګډونوالو د دغه روزنیز پروګرام ستاینه وکړه او ټینګار یې وکړ چې ترلاسه شوي مهارتونه به د دوی په ورځنیو اداري چارو کې مثبت بدلون راولي.
د نشراتو او عامه اړیکو عمومي مدیریت
نېټه: یکشنبه
۱۴۴۷هـ.ق، ذوالقعدة الحرام ٩ مه
۱۴۰۵هـ.ش، ثور ٦ مه
۲۰۲۶م، اپریل ٢٦ مه
